تاند (سې شنبه، د لیندۍ/ قوس ۶ مه) د ایران د بهرنیو چارو وزارت ویاند، اسماعیل بقایي وايي چې په افغانستان کې د ایران د استازي بدلون یو عادي او منظم بهیر دی.
ده دا خبره د هغو راپورونو په ځواب کې وکړه چې وایي د ایران له خوا په افغانستان کې د کاظمي قمي پر ځای د علی رضا بیکدلي له ټاکلو سره به د افغانستان په اړه د ایران سیاست بدل شي.
بقايي وویل چې د ایران په استازو او دیپلوماتیکو او قونسلي ماموریتونو کې بدلونونه یو منظم بهیر دی چې په ټاکلو وختونو کې ترسره کېږي.
د یکشنبې په ورځ د ایران د بهرنیو چارو وزیر عباس عراقچي، بیکدلي د کابل لپاره د ایران د ماموریت د مشر په توګه وټاکه. او په عین حال کې یې اعلان وکړ چې د افغانستان لپاره د ایران د ولسمشر د ځانګړي استازي چوکۍ حدف شوې ده.
د ایران د باندنیو چارو وزارت پر اساس، له دې ایسته به د افغانستان لپاره د ایران ځانګړی استازی د ایران له باندنیو چارو وزارت سره تړاو لري.
کاظمي قمي د ایران په سپاه پاسداران پورې تړاو درلود چې د طالبانو له حکومت سره نژدې اړیکې پالي خو د ایران په بهرنیو چارو وزارت کې تل د طالبانو په اړه انتقادونه شوي دي.
بیکدلي مخکې د قونسلګریزو چارو د مرستیال وزیر په توګه، او په اذربایجان، ترکیې او قبرس کې د ایران د سفیر په توګه دنده ترسره کړې ده.