تاند (دوشنبه، د لیندۍ/ قوس ۵ مه) ټاکل شوې ده چې “د افغانستان د ځان بسیاینې د زرغون انقلاب لومړی نړیوال کنفرانس” تر عنوان لاندې د کابل پوهنتون له لوري د کندهار په اناستوی پوهنتون کې غونډه جوړېږي.
دا به د طالبانو تر واک لاندې حکومت کې لومړنۍ نړیواله غونډه وي.
د کرنې، اوبو لګولو او مالدارۍ وزارت د معلوماتو له مخې، په دې غونډه کې د کاناډا، نایجیریا، تایلند، هند، پاکستان، قطر، بنګله دېش، مصر، ترکیې او ایران د کرنې برخې متخصصان، پالیسي جوړونکي او صنعتکاران ګډون کوي او علمي مقالې او د کرنې د پراختیا او ستونزو حللارې وړاندې کوي.
دغه وزارت او همداراز باختر خبري اژانس چې په دې اړه یې خبر خپرور کړی، د غونډې دقیق وخت نه دی یاد کړی.
په دې غونډه کې د کندهار مشران، د طالبانو د اسلامي امارت د کابینې غړي او داخلي متخصصان هم ګډون کوي. د کرنې سرپرست وزیر مولوي عطاالله عمري به هم وینا وکړي.
د طالبانو د حکومت په وینا، یاده غونډه به د داخلي او خارجي متخصصانو ترمنځ د نظرونو د تبادلې او د کرنې د پراختیا او د افغانستان د ځان بسیاینې لپاره د اغېزناکو لارو چارو د وړاندې کولو لپاره ښه فرصت وي.