د روان ۲۰۲۴ مېلادي کال د نومبر پر ۲۳مه، شاوخوا سلو تنو افغان منورینو واشنګټن ډي سي ته څېرمه د ویرجینیا په لیالي کیفې کي د ښاغلي عبدالباري جهاني د دیني څېړنیز کتاب، “فتوا او تصوف: ملګري که مخالف” مخکتنه وکړه.
د مخکتني په غونډه کي چي د جهاني بنسټ له خوا د منزې شهید په کوربه توب جوړه سوې وه، په پیل کي لیکوالي او خبریالي شهناز نفیس، پوهاند استاد لال پاچا ازمون، د ډېوې راډیو مشر او ژورنالیست نفیس ټکر، او د افغانستان د متحدي جبهې مشر ډګرجنرال سمیع سادات خبري وکړې او د کتاب پر منځپانګه یې خپل نظرونه وړاندي کړل.
ویناوالو په پښتو ژبه د اسلامي تاریخ د فتواوو ددغو څېړنو او د افغانستان د اوسنیو شرایطو سره د تړاو له امله د ښاغلي جهاني زیار وستایه او ټینګار یې وکړ چي ددغه کتاب مهم پیغامونه تر عامو خلکو ورسېږي تر څو د دین او مذهب په نامه یې افراطي ډلي حقونه تلف نه کړي.
د غونډي په دوهمه برخه کي ښاغلي جهاني د خپل دغه اثر د منځپانګي غورچاڼ وړاندي کړ. نوموړي وویل چي اسلامي فتواوي په تاریخي توګه د واک او ځواک لپاره کارول سوي او د مسلمانانو د وېشلو او ځپل کېدلو لامل سویدي. د ښاغلي جهاني په خبره، د تصوف ډېري کړني د اسلام له اړخه شرک بلل کېدلای سي خو ملایان یې په اړه غلي دي مګر همدا ملایان د پرمختګ د نظریو په وړاندي درېدلي او فتواوي یې صادري کړیدي. هغه وویل چي د همدې وضاحت لپاره یې وغوښتل چي په پښتو ژبه د عامو وګړو لپاره دا موضوع روښانه کړي تر څو دین د ملا له انحصاره وباسي. د نوموړي په خبره، د اسلام دین ته تر بل هر چا ملایانو ډېر زیان رسولی دی.
د غونډي په درېیمه برخه کي هارون حکیمي د کتاب د منځپانګي په اړه بحث پیل کړ او دغه راز، ښاغلي جهاني د ګډونوالو پوښتني ځواب کړې.
د غونډي په پای کي د جهاني بنسټ مشر نسیم پښتون شریفي د ګډونوالو د حضور او ویناوالو د همکارۍ ستاینه وکړه او هیله یې څرګنده کړه چي د خپل بنسټ او دغه راز لیالي کیفې له لوري به د دا ډول ناستو لړۍ روانه ساتي.
غونډه د ګڼو کلتوري او هنري شخصیتونو په لیدنو او عصريې ماښام مهال پای ته ورسېده.
