تاند (یکشنبه، د لیندۍ/ قوس ۴ مه) د افغانستان د زعفرانو اتحادیې مرستیال، سید عبدالواحد سادات وايي چې په هرات ولایت کې له ۵۰ زرو څخه تر ۶۰ زرو پورې ښځې د زعفرانو په پروسس بوختې دي.
د طالبانو تر کنټرول لاندې باختر خبري آژانس پرون، شنبې (د نومبر په ۲۳مه) راپور ورکړ چې د افغانستان د زعفرانو د اتحادیې په وینا، په افغانستان کې د زعفرانو ۸۵ سلنه پروسس ښځې ترسره کوي.
راپورونه وايي چې ډیر شمېر نجونو چې طالبانو یې پر زده کړو بندیز لګولی، د زغفرانو کرکیلې ته مخه کړې ده.
د زده کړو ترڅنګ له عامه ژوند او اقتصادي فرصتونو څخه محرومیت هم سبب شوی چې ډېرې ښځې، د زعفران د پروسس کولو په څېر دندې پیل کړي.
په وروستیو کلونو کې په افغانستان کې د زعفرانو کرکېله زیاته شوې او اوس پر هرات سربېره په ګڼو نورو ولایتونو کې هم دود شوې ده.
د متحدو ایالتونو د نړیوالې انکشافي ادارې (USAID) په وروستیو کې وویل چې په ۲۰۲۴ کال کې د پاریس په نندارتون کې د ۶۰۰ کیلوګرامه افغان زعفرانو د پلور لپاره یو تړون لاسلیک شوی، چې ارزښت یې له ۱ میلیونه ډالرو څخه زیات دی.
سږ کال د بلجیم د خوند نړیوال انستیتیوت د افغانستان زعفران د نهم ځل لپاره د نړۍ تر ټولو ښه زعفران وبلل.