تاند (دوشنبه د عقرب ۲۱) ملګرو ملتونو په یوه راپور کې ویلي، چې په افغانستان کې د کوکنارو کښت ۱۹ سلنه زیات شوی، خو هممهاله د طالبانو مشر “هبتالله آخندزاده” په یوه فرمان کې چې ۱۱ فصله او ۳۲مادې لري د مخدره موادو د کښت او قاچاق د مخنیوي لپاره صادر کړی دی.
د ټولنیزو رسنیو له لارې خپور شوي مکتوب پر بنسټ، د بادغیس ولایت د طالبانو د پولیسو قوماندانۍ د دې نوي فرمان خبر ورکړی او د دې ولایت اوسېدونکي یې د مخدره موادو له کښته منع کړي دي.
د طالبانو مشر د ۱۱ فصلونو او ۳۲ مادو په فرمان کې د مخدره موادو کښت، قاچاق او کارول منع کړي دي.
د دې فرمان په لومړي فصل کې راغلي، چې که څوک له نیم جریب څخه لږه ځمکه باندې تریاک یا چرس وکري، په ۶ میاشتو تنفیذي بند به محکوم شي.
په دوهم فصل کې راغلي، که یو کس له یوې کیلو څخه لږ تریاک یا چرس له بهر څخه افغانستان ته انتقال کړي، نو د اړوندو محکمو له خوا به په یوه کال بند محکوم شي.
دغه راز په درېیم فصل کې راغلي،که یو کس د مخدره موادو پلورونکی وي او له هغه څخه د هر ډول مخدره موادو پنځه ګرامه لاسته راشي، د اړوندو محکمو له خوا به په یو کال تنفیذي بند محکوم شي.
بل لورته بیا د طالبانو حکومت په دې اړه په رسمي توګه څه نه دي ویلي.