تاند (دوشنبه د عقرب ۲۱مه) طالبانو د اوبو او انرژۍ وزیر عبداللطیف منصور او اوکرایني کارپوهانو د پنجشیر څخه کابل ته د اوبو د لېږد پروژې په اړه خبرې وکړې.
د طالبانو د حکومت د اوبو او انرژۍ وزارت ویاند، مطیعالله عابد وایي چې اوکرایني کارپوهانو د یاد وزارت د کارکوونکو د ظرفیت لوړونې په برخه کې هم د مرستې ژمنه وکړه.
د ماهیپر، نغلو، سروبي او درونټې برښنا بندونو ساتنه او تخنیکي مرسته نور هغه موضوعاتو دي چې په دې لیدنه کې پرې بحث وشو.
په دې خبرو اترو کې د دواړو لوریو ترمنځ د یوې هوکړې د لاسلیک غوښتنه هم شوې ده.
طالب چارواکي وایي له پنجشیر سیند څخه کابل ته د اوبو د لېږد کار به شاوخوا درې کاله وخت ونیسي او په بشپړېدو سره به د کابل د شاوخوا دوه ملیونه اوسېدونکي د څښاک له اوبو برخمن شي.
د طالبانو د حکومت چارواکو د تیر کال په اوړي کې هم د پنجشیر سیند څخه کابل ته د اوبو د لېږد په اړه غونډه کړې وه خو هغه مهال یې پر چټکتیا ټینګار شوی وو.
د پنجشیر د اوبو د لېږد طرحه په پخواني حکومت کې هم مطرح وه.
د افغانستان د ۱۳۹۹ کال د بودیجې په سند کې د کابل ښار لپاره د اوبو رسولو درې مهمې پروژې په نظر کې نیول شوې وې چې په دې کې یوه یې د پنجشیر د اوبو لېږد پروژه وه.
دا په داسې حال کې ده چې په کابل کې د څښاک د اوبو کموالی د پایتخت اوسېدونکو لپاره یوه جدي ستونزه ګڼل کېږي.