تاند (دوشنبه، د عقرب ۲۱ مه) د افغانستان د بیارغونې د څارنې لپاره د امریکا د سرمفتش په وینا، په تېرو درې کلونو کې امریکا له افغانستان څخه د خلکو پر ایستلو او بیا مېشتولو تر ۱۴ ميليارد ډالرو ډېرې پیسې لګولي دي.
د سیګار پر اساس، د دې پیسو ډېره برخه د امریکا پوځي لګښتونه و، چې د تخلیې الوتنې یې وکړې او زرګونه افغانان یې امریکا ته له رسولو وروسته د څو میاشتو لپاره په پوځي اډو کې ځای پر ځای کړل.
د واشنګټن ټایمز د پروني (یکشنبې) راپور له مخې، دا پیسې همداراز له پوځي اډو څخه د افغانانو له وتلو وروسته د هغوی پر بیا مېشتېدو لګولي دي.
له دې سره سره، امریکا د ۲۰۲۱ کال په دوبي کې د طالبانو تر واکمنۍ وروسته افغانستان ته تر ۳ ميليارد ډالرو ډېرې پیسې لېږلې دي، ځکه چې د بایډن اداره هڅه کوي دې جنګ ځپلي هېواد ته د بشرپالنې مرستې په داسي حالت کې زیاتې کړي چې د طالبانو لاس ته ورنه شي.
“د افغانستان د بیارغونې لپاره د امریکا د ځانګړي سرمفتش او د هغه د ټیم په وروستي درې میاشتني راپور کې ویل شوي، متحدو ایالتونو د افغانانو لپاره تر ټولو لوی مرسته کوونکی پاتې شوی دی”.