بنګله دېش له افغانستان څخه د درو یو ورځنیو سیالیو دوهمه مسابقه په ۶۸ منډو وګټله او لوبلړۍ یې تر دې دمه مساوي کړه.
د دې لړۍ لومړۍ مسابقه افغانستان د ۹۲ منډو په توپیر ګتلې وه.
د افغانستان په کوربه توب د دې سیالۍ پچه بنګله دېش وګټله او غوره یې وبلله چې لومړی بټنګ وکړي. د شارجې د لوبغالي په اړه ویل کېږي چې هره لوبډله لومړی بیټنګ وکړي د بری چانس یې ډېر دی.
بنګالي لوبغاړو د ۷ لوبغاړو له سوځېدو او د ۵۰ اورونو په پای کې ۲۵۲ منډې وکړې.
د افغان توپ اچونکو په ډله کې دا ځل ننګیالي خروټي ۳، الله محمد غضنفر او راشدخان دوه ـ دوه لوبغاړي وسوځول.
ننګیالي ته، سره له دې چې درې لوبغاړي سوځولي وو او د ورکړو منډو اوسط یې ټیټ و، چانس ورنه کړل شو چې ټول ۱۰ اورونه ولوبوي خو د ده پر ځای فاروقي ته، چې په نننۍ لوبه کې ښه نه ځلېده، د وروستیو اورونو د بالینګ چانس ورکړل شو.
همداراز په داسي حال کې چې افغان لوبډلې ۷ باولران لرل، محمد نبي ته د ۱۰ اورونو د لوبېدو چانس ورکړل شو.
د افغانستان په لوبډله کې یوازې رحمت شاه پنځوسیزه پوره کړای شوه. ګوربز د تېرې سیالۍ په شان ډېر ژر وسوځيد.
صدیق اتل هم نسبتاً ښه توپ وهنه وکړه. ده ۳۹ او ګلبدین نایب ۲۶ منډې وکړې.
په باولینګ یا توپ اچونه کې د راشد خان، چې ۲ لوبغاړي یې وسوځول، اکانومي ۳ اعشاریه ۲۰، د ننګیالي خروټي، چې ۳ لوبغاړي یې وسوځول، ۳ اعشاریه ۵۰، او د غضنفر، چې ۲ لوبغاړي یې وسوځول، ۳ اعشاریه ۵۰ وه.
د ګڼو سیالیو تجربې ښودلې، افغان لوبډلې هره هغه سیالي ګټلې چې پیلګرو لوبغاړو یې تر ۵۰ زیاتې منډې کړي دي.
د بنګله دېش په توپوهونکو کې نجمل حسین شانټو ۷۶، ذاکرعلي ۳۷ ناسوځېدلې او سومیا سرکار ۳۵ منډې وکړې.
ټاکل شوې ده چې د دواړو لوبډلو ترمنځ درېیمه سیالي، چې د دې لوبلړۍ ګټونکی ټاکي، د روان نوومبر په یوولسمه (د دوشمنبې ورځ) په شارجه کې وشي.
زه فکر کوم چې په عنوان کې د «بنګله دېش» لفظ باید وروسته لاړ شي. که نشي، په دې حالت کې داسې معنی ورکوي لکه تېره او دا لوبې دواړه چې بنګله دېش ګټلې وي.
داسې صحیح برېښي:
دوهمه یو ورځینۍ مسابقه بنګله دېش وګټله