تاند (پنجشنبه، د عقرب ۱۷ مه) ټاکل شوې ده چې د امریکا ولسمشر جو بایډن، نن (پنجشنبې) د سهار په ۱۱ بجې (د افغانستان د ماښآم اووه نیمې) په سپینه ماڼۍ کې امریکایانو ته د واک د انتقال ذ پروسې د پیل په اړه وینا وکړي.
د امریکا اوسنی ولسمشریزه دوره به د جنورۍ تر ۲۰مې پورې دوام وکړي، یعنې څه باندې دوې میاشتې لا ورته پاته دي. د امریکا د اساسي قانون له مخې، د دونالډ ټرمپ د لوړې مراسم به د جنورۍ په ۲۰مه، د ماسپښین په ۱۲ بجو ترسره شي.
د امریکا منتخب ولسمشر، دونالډ ټرمپ، له ټاکنو مخکې د سې شنبې په ورځ ویلي و چې که ولسمشر غوره شي، د واک د انتقال په جریان کې به د اوکراین جګړې ته د پای ټکی کېږدي. په داسې حال کې چې په دې موده کې هغه د قانون له مخې واک ته نه دی رسېدلی او د امریکا د پالیسیو په اړه د پرېکړې صلاحیت نه لري.
ډونالډ ټرمپ دا ژمنه هم کړې ده چې سپینې ماڼۍ ته له ننوتلو وروسته به ډېر شمېر غیرقانوني کډوال له هېواده وباسي او د عامې روغتیايي بیمې پروګرام چې د «اوباماکېر» په نوم پېژندل کېږي، پای ته ورسوي.
له اوس څخه د ټرمپ د لوړې تر ورځې به څه وشي؟ په امریکا کې د بېلابېلو ایالتونو انتخابي چارواکي به د پنجشنبې په ورځ د رایو د پایلو د تائید لړۍ پیل کړي. دا بهیر به څو اوونۍ دوام وکړي.
د واک د سولهییز انتقال بهیر به د نوومبر په ۱۱مه، د دوشنبې په ورځ پیل شي. فدرالي ادارې به له دې نېټې څخه د ټاکل شوي ولسمشر انتقالې ډلې ته د اړوندو موضوعاتو او دندې په اړه اړین معلومات ورکړي چې په نوي حکومت کې باید پرېکړه وشي.
د دسمبر په ۱۱مه، د ایالتونو واليان باید د ټاکنو تایید شوې پایلې لاسلیک کړي، تر څو دا پایلې د امریکا کانګرس ته واستول شي. له هغې شپږ ورځې وروسته به د هر ایالت الکترال کالج غونډه وکړي چې د نوي ولسمشر لپاره رایې ورکړي. دا مراسم زیاتره سمبولیک اهمیت لري، او تمه ده چې ډیری ټاکل شوي استازي به دله مخکینۍ ژمنې سره سم ډونالډ ټرمپ ته رایه ورکړي.
د الکترال کالج رایې باید د دسمبر تر ۲۵مې پورې کانګرس ته ورسیږي. نوی کانګرس به د جنورۍ په ۳مه کار پیل کړي او د استازو جرګې نوی ريیس به وټاکل شي.
د جنورۍ په ۶مه به په کانګرس کې الکترال رایې وشمیرل شي. د دې غونډې مشري به د اوسني مرستیال ولسمشر کامیلا هیرس او د استازو جرګې نوی مشر وکړي.
له دې وروسته، د جنورۍ په ۲۰مه به، نوی ولسمشر د کانګرس ودانۍ مخې ته د ولسمشرۍ لوړه وکړي. تمه ده چې جو بایډن په دې مراسمو کې ګډون وکړي، په داسې حال کې چې څلور کاله مخکې ډونالډ ټرمپ د بایډن د لوړې په مراسمو کې ګډون نه و کړی.
د منځني ختیځ کړکېچ، د اوکراین جګړه، او د ایران د اتومي پروګرام په شان د امریکا د کورني او بهرني سیاست مهمې پرېکړې به د جنورۍ تر ۲۰مې پورې د جو بایډن په ادارې پورې اړه ولري. که څه هم په دودیزه توګه ولسمشران په انتقالي دوره کې اوږدمهاله او اغیزمنې پرېکړې نه کوي یا د ټاکل شوي ولسمشر د انتقال له ډلې سره سلا مشورې کوي.
تمه ده چې د نړۍ ډېری مشران، لکه بنيامين نتنياهو به د انتقال په دې موده کې له ډونالډ ټرمپ سره په تماس کې وي، او د جاپان صدراعظم شيګرو ايشيبا په څېر ممکن هڅه وکړي چې له هغه سره وویني.