تاند (چهارشنبه، د عقرب ۱۶ مه) پر اسراییل د درېیم برید په اړه د ایران د پوځي چارواکو د ګواښونو په دوام کې، د سپاه پاسداران د عمومي قوماندان مرستیال اعلان وکړ چې د ایران خلک دې د اسراییل د “جنایت ځواب” ته په تمه اوسي.
د سپاه پاسداران د قدس ځواک د همغږۍ مرستیال ایرج مسجدی، په تهران کې د حزبالله د پخواني عمومي منشي حسن نصرالله د څلوېښتمې په مراسمو کې وویل چې د ایران اسلامي جمهوریت څو ځله امریکا او اسراییل ته خبرداری ورکړی دی چې که ایران ته ګواښ وکړي، دوی به یې په قوت ځواب ووايي او دا هېوادونه دې د داسې غبرګون په تمه وي.
هغه زیاته کړه چې دغو دواړو هېوادونو ته په کار نه ده چې له ایران څخه د زغم تمه ولري.
اسراییل د اکتوبر په ۲۷مه نېټه د ایران د اکتوبر د لومړۍ نېټې د اوغندويي بریدونو په ځواب کې د ایران په یو شمېر پوځي مرکزونه بمباري کړل. د راپورونو او سپوږمکیزو تصویرونو له مخې، د دغو بریدونو له کبله، چې شاوخوا ۱۰۰ ایف ۳۵ جنګي الوتکو پکې برخه لرله، د ایران د ایس ۳۰۰ څلور واړه دفاعي او راګرځوونکی سیستمونه ویجاړ کړل.
سره له دې چې ایراني چارواکي پر اسراییل د غچ اخیستونکي برید خبرې کوي، د اسراییل ۱۳مې تلویزیوني شبکې د دې هېواد د پوځي او امنیتي سرچینو د ارزونو پر بنسټ ویلي چې د ایران له خوا پر اسراییل د احتمالي برید نښې نښانې نه دي لیدل شوي. خو له دې سره سره امریکا خپلې بي ۵۲ ستراتیژیکې بمبارد الوتکې سیمې ته استولي او اسراییل د ایران د احتمالي برید لپاره بشپړه تیاري نیولې ده.
له بلې خوا د اسراییل د “ملي کمپ” ګوند مشر بني ګانتس، غوښتنه کړې چې هیواد یې باید د ایران پر اتومي تاسیساتو د په برید غور وکړي.
د اسراییلي رسنیو د راپورونو له مخې، ښاغلي ګانتس د دوشنبې په ورځ، د نومبر په ۱۴مه نېټه، د خپل ګوند په یوه غونډه کې وویل چې اسراییل باید له “سیاسي، اقتصادي او نظامي له اړخه چمتو وي چې د ایران اټتومي تاسیسات له منځه یوسي.”