تاند (دوشنبه د عقرب ۱۴مه) د افغانستان د فوټبال فدراسیون مسوولین وايي چې د افغانستان د زونونو د غوره لوبډلو ترمنځ د فوټبال سیالۍ نن دوشنبه پيلېږي.
یادې سیالۍ د پینځو زونونو ترمنځ د هرات په کوربتوب پيلېږي.
د معلوماتو له مخې له دې سیالیو به دوه مخکښې لوبډلې د افغانستان د فوټبال اتلانو لیګ ته لار مومي.
هرات، ننګرهار، کابل، هلمند او بلخ کلبونه په دې سیالیو کې برخه لري. د دې سیالیو لومړۍ لوبه د هرات او کابل استازو کلبونو ترمنځ ترسره کېږي.
وروستۍ لوبه به د نومبر په ۱۰مه ترسره شي.