تاند (جمعه، د عقرب ۱۱ مه) د امریکا نیویورک تایمز ورځپاڼې د پنجشنبې په ورځ د درې ایراني چارواکو له قوله راپور ورکړ چې د ایران مشر علي خامنه يي د خپل هیواد د ملي امنیت عالي شورا ته امر کړی چې د اسراییل پر ضد د برید لپاره چمتووالی ونیسي.
دغو چارواکو ویلي چې خامنه يي دا پرېکړه د دوشنبې په ورځ یادې شورا ته ابلاغ کړې ده.
د نیویورک ټایمز د راپور له مخې، د ایران مشر علي خامنهيي خپله پرېکړه وروسته له هغې وکړه چې د جګپوړو پوځي قوماندانانو له خوا د اسراییل د وروستي برید په اړه یو مفصل راپور وڅېړل شو.
په راپور کې د ایران د توغندیو جوړونې وړتیاوو، د هوايي دفاعي سیستمونو، د تهران په شاوخوا کې د انرژۍ مهمو زېربناوو، او په جنوبي سیمه کې یو مهم بندر باندې د شویو بریدونو د زیانونو په اړه معلومات ورکړل شوي.
درې ایراني چارواکو ویلي، دغه برید دومره پراخ و چې ځواب نه ورکول یې د ماتې په مانا دی.
نیویورک ټایمز د درې ایراني چارواکو په قول همداراز لیکلي چې د ایران پوځي مشران په اسراییل کې د “نظامي اهدافو” لست جوړوي.
دوی وايي چې دا برید ښايي د امریکا له ټاکنو وروسته ترسره شي، ځکه ایران ویره لري چې په سیمه کې د تاوتریخوالي زیاتوالی به د ډونالډ ټرمپ په ګټه وي.
د امریکا د ولسمشرۍ انتخابات د روان نوومبر په ۵ مه (سې شنبې) دي.
په دې راپور کې یادونه شوې چې لا هم روښانه نه ده چې د ایران ځواب به څنګه او کله وي، او ایا دا خبرې یوازې په مذاکراتو کې د فشار راوړلو لپاره دي او که نه.
له بلې خوا، اکسیوس ویبپاڼې د دوو باخبرو سرچینو پر اساس راپور ورکړی چې د اسراییل استخباراتي ارزونې ښیي چې ایران د عراق له خاورې څخه په راتلونکو ورځو کې پر اسراییل د برید تیاری کوي. راپور زیاتوي چې ښايي دغه برید د امریکا د ولسمشرۍ تر انتخاباتو مخکې وشي.
د اکسیوس د راپور له مخې، ایران به غالباً د بېپیلوټه الوتکو او توغندیو له لارې، او د خپلو نیابتي ډلو په وسیله چې په عراق کې فعالې دي، پر اسراییل برید وکړي.
د راپور لیکوال، باراک راوید، څرګنده کړې چې ایران ښايي له مستقیم برید څخه ډډه کوي ترڅو د اسراییل له احتمالي غبرګون څخه د خپلو ستراتیژیکو اهدافو ساتنه وکړي.
د ایران چارواکو تر اوسه د نیویارک ټایمز او اکسیوس د دغو راپورونو په اړه څه نه دي ویلي خو ځینو ایراني چارواکو په زغرده ویلي چې د اسراییل برید به بې ځوابه پاته نه شي.
د پنجشنبې په ورځ، د ایران د سپاه پاسداران قوماندان حسین سلامي په شېراز کې وویل چې اسراییل به پر ایران د خپلو وروستیو حملو ځواب په «نه تصورکېدونکې بڼه» وویني.
د ایران د سپاه پاسداران د عمومي قوماندان سرپرست علي فدوي هم پرون (پنجشنبې) وویل چې اسراییل ته به ایران حتماً ځواب ووايي.
له بلې خوا د ایران د مشر د دفتر رئیس محمد محمدي ګلپایګاني وویل چې اسراییل ته به د ایران ځواب سخت وي.
دا په داسي حال کې ده چې د اسراییل له وروستۍ حملې وروسته ایراني چارواکو ویلي و چې ایران یې د اسراییل د بریدونو په وړاندې د ځواب ویلو حق ځان ته خوندي بولي.