تاند ( چهارشنبه د عقرب ۹مه) د چین سفیر په اسلام اباد کې د یوه کنفرانس پرمهال د امنیت مسله د چین ـ پاکستان د اقتصادي دهلېز د بریا پر وړاندې تر ټولو ستر خنډ وباله.

جیانګ زیدونګ د پاکستان له حکومته وغوښتل چې د ټولو چین ضد ترهګرو ډلو پر ضد پوځي عملیات پیل کړي.

د چین سفیر جیانگ زیدونګ پرون سه‌شنبه دا څرګندونې په یاد کنفرانس کې وکړې.

هغه په ​​تیرو شپږو میاشتو کې په پاکستان کې پر چینايي کارګرانو دوه وژونکي بریدونه د نه منلو وړ وبلل.
جيانګ زيډونګ د دغو بريدونو د عاملينو د مجازاتو او د چين ضد «تروريستي» ډلو د ځپلو پر اړتيا هم ټينګار وکړ.

په دې کنفرانس کې د پاکستان د بهرنیو چارو وزیر او د لومړي وزیر مرستیال اسحاق ډار د خپل هېواد امنیتي وضعیت له افغانستان سره د پاکستان د پخواني حکومت د “دوستۍ سیاست” وباله.

نوموړي پر افغانستان د طالبانو له واکمنۍ وروسته د پاکستان د استخباراتي ادارې د پخواني مشر فیض حمید سفر ته هم اشاره وکړه.

ډار وویل، «موږ باید د چای پیالې په خاطر ځان ملامت کړو، چې په کابل کې مو وڅښلو. موږ باید د هغو ۱۰۲ سخت دریځو مجرمینو په اړه ځان ملامت کړو چې په مختلفو جرمونو کې ښکیل وو خو له یو پیاله چای وروسته خوشې شول.»

د پاکستان د بهرنیو چارو وزیر او د لومړي وزیر مرستیال هم ټینګار وکړ چې په دغه هیواد کې د ترهګرو پر ضد عملیات پیل شوي او د هغې پایلې به ډیر ژر وړاندې شي.