تاند ( دوشنبه د میزان ۱۶مه) د شمالي وزیرستان اتمانزو جرګې د پښتون ژغورنې غورځنګ د ۱۱ م اکتوبر غونډه کې د ګډون لپاره خپل روان اعتراض پای ته ورسوه.
یادې جرګې له يوې مودې راهيسې په سيمه کې د امنیت په اړه د حکومتي ژمنو نه پوره کېدو پرضد اعتراض ته دوام ورکړی وو او د ميرامشاه او غلام خان تجارتي لاره يې تړلې وه.
د اکتوبر په ۶مه، د اتمانزو جرګې مشر مولانا بیت الله یوې خبرې غونډې ته د وينا پر مهال وويل، چې دوی د اکتوبر په ۱۱مه د پي ټی اېم لخوا په اعلان شوې جرګه کې د ګډون په خاطر خپل اعتراض ځنډوي.
نوموړي زیاته کړه چې داسې ګونګوسې خپرېدې چې ګواکې دوی د پښتون ژغورنې د ناستې د ناکامولو هڅې کوي چې دا بې اساسه خبرې دي او دوی به د اکتوبر ۱۱مې په جرګه کې په ټولیز توګه ګډون کوي.
تر دې اعلان وروسته دوی سړکونه خلاص کړل چې ورسره د غلام خان لاره هم پرانیستل شوه.