تاند (دوشنبه، د میزان ۱۶ مه) دوو امریکايي ساینسپوهانو ویکتور امبروس (Victor Ambros) او ګري رفکان (Gary Ruvkun) د دوشنبې په ورځ په ګډه د “جینونو د تنظیم” او “مایکرو ار این اې” (MicroRNA) په اړه د څیړنې لپاره د ۲۰۲۴ کال د طب د نوبل جایزه وګټله.
د نوبل جایزې کمېټې په یوه خبرپاڼه کې ویلي، دواړو ساینسپوهانو د جینونو ترمنځ د اړیکو په برخه کې مهمه موندنه کړې ده.
مایکرو ار این اې د RNA مالیکولونو یوه نوې ډله ده چې د جین د بیان په تنظیم کې مهم رول لوبوي. د دغو دوو ساینسپوهانو څیړنو ښودلې چې دا مالیکول د انسانانو په شمول د څو حجروي موجوداتو لپاره اړین دي.
۷۰ کلن ویکتور امبروس د متحدو ایالتونو د ماساچوسیټ د طب پوهنتون د بیولوژۍ استاد دی. هغه په ۱۹۷۵ کې له ماساچوسیټ پوهنتون څخه د بیولوژۍ په برخه کې د لیسانس سند ترلاسه کړ او په ۱۹۷۹ کې یې د نوبل جایزې د ګټونکي ډیویډ بالټیمور تر څارنې لاندې په ورته پوهنتون کې خپل دوکتورا یا پي ایچ ډي بشپړ کړ.
امبروس د نوبل جایزې د ګټونکي رابرټ هورویتز په لابراتوار کې د لومړني پوسټ دوکتورا د همکار په توګه په ماساچوسیت پوهنتون کې خپلې څیړنې ته دوام ورکړ. هغه په ۱۹۸۴ کې د هارورډ پوهنتون د علمي پلاوي غړی شو او په ۱۹۹۲ کې په دارتموت کالج کې شامل شو.
ښاغلی رافکان چې ۶۹ کلن دی، د مالیکول بیولوژیست هم دی او د ماساچوست په عمومي روغتون او هارورډ طبي ښوونځي کې څېړونکی دی.
ښاغلي رافکان په ۱۹۷۳ کې د کلیفورنیا پوهنتون له برکلې څخه د لیسانس سند ترلاسه کړ، او د دوکتورا د دورې څېړنه یې په هارورډ پوهنتون کې د امریکایي بیولوژیست فریډریک اوسوبل په لابراتوار کې وکړه. ده د خپلې دوکتورا زده کړې په هارورډ پوهنتون کې والټر ګیلبرټ او په ماساچوسیټ پوهنتون کې د رابرټ هورویتز تر څارنې لاندې بشپړې کړې.
د طب په برخه کې د نوبل جایزه تر ټولو لوړه علمي جایزه ګڼل کېږي او ګټونکی یې ۱۱ میلیونه سویډني کرون ترلاسه کوي، چې د ۹۶۸ زره یورو معادل دي.