تاند ( یکشنبه د میزان ۱۵مه) د پاکستان په پلازمېنه اسلامآباد او د دې هېواد په یوشمېر کوچنیو ښارونو کې د عمران خان د پلویانو لارویونونه دوام لري.
پاکستاني حکومت له خپلو پوځیانو غوښتي چې سر له نن څخه د پلازمېنې په بېلابېلو سیمو کې ځای پرځای شي.
د عمران خان پلویانو داسې مهال په اسلام اباد کې لارویونونو ته زور ورکړی، چې ټاکل شوې د اکټوبر په ۱۵مه په دې ښار کې د شانګهای همکارۍ د سازمان غونډه ترسره شي.
د همدې غونډې په درشل کې تحریک انصاف اسلامآباد د خپلو اعتراضونو لپاره غوره کړی دی.
د پاکستان امنیتي ځواکونو پلازمېنې ته د عمران خان د زرګونو پلویانو د داخلېدو د مخنیوي لپاره ښار ته غځېدلې لارې تړلي، د ټیلیفون زیګنالونه یې بند کړي دي.
د پاکستان د کورنیو چارو وزارت ویلي چې چاته به اجازه ورنه کړي چې د ګډوډیو د جوړېدو لپاره ښار ته داخل شي.
په ورته وخت کې بیا تحریک انصاف ګوند ادعا کړې چې امنیتي ځواکونه په اسلامآباد کې د خیبرپښتونخوا د اعلی وزیر د استوګنې ځای ته ننوتي او وزیر اعلی علي امین ګنډاپور یې نیولی، خو پولیسو دا ادعا رد کړې ده.
د پاکستان د بشري حقونو کمېسیون پرون په خپله ایکسپاڼه په یوه خبرپاڼه کې له پاکستاني حکومت وغوښتل څو د تحریک انصاف ډلې له اعتراضونو سره په اسلامآباد، د پنجاب په نورو سیمو او ټول پاکستان کې له زغمه کار واخلي.
د امنیتي ځواکونو او لاریون کوونکو ترمنځ د اخ او ډب راپورونه هم خپاره شوي دي.