تاند (یکشنبه،د میزان ۱۵ مه) بېلتون غوښتونکې ډله، د بلوچستان د ازادۍ پوځ ادعا کوي چې د شنبې په ورځ یې د بلوچستان ایالت په کلات کې د پاکستان د پوځ پر کاروان په برید کې ۹ پوځیان وژلي دي.
دې ډلې تېره شپه رسنیو ته په استولې خبرپاڼه کې همداراز ویلي چې په دې برید کې، چې د کلات په دشت محمود سیمه کې یې وکړ، ۵ نور پاکستاني پوخیان ټپیان شوي دي.
د بلوچستان د ازادۍ پوځ په خبرپاڼه کې ویل شوي چې دوی د پاکستاني پوځ د سپرلۍ د پیک اپ موټر په لاره کې له لیرې د کنټرولېدونکي بم په چاودنه وکړه چې له کبله یې د پیک اپ پنځه سپرلۍ ووژل شوې.
له دې برید وروسته د دوی وسله والو د پوځیانود کاروان پر نورو موټرونو د درنو وسلو ډزې وکړې چې په پایله کې یې څلور پوځیان ووژل شول او لږترلږه ۵ نور ژوبل شول.
د پاکستان پوځ او خپلواکو سرچینو د بلوچستان د ازادۍ پوځ د ادعاوو په اړه تر اوسه څه نه دي ویلي او د دې لپاره چې د پاکستان پوځ او استخبارات پر رسنیو سخت بندیزونه لګولي، تمه نه کېږي چې خپلواکې رسنۍ دې په دې اړه څه ووايي.