تاند (پنجشنبه، د میزان ۱۲ مه) د روسیې د بهرنیو چارو وزارت ویاندې ماریا زخارووا وویل، د مسکو فارمټ د مشورتي ناستې لومړیتوب به د افغانستان د سولې پر بهیر بحث او د سیمې او کابل تر منځ په سیاسي، اقتصادي، تروریزم او مخدرو موادو پر ضد د مبارزې په برخو کې د عملي تعامل پراختیا وي.
هغې پرون (چهارشنبې) په مسکو کې وویل، د طالبانو د حکومت د بهرنیو چارو وزیر امیر خان متقی د دې غونډې ځانګړی میلمه دی او د روسیې له بهرنیو چارو وزیر سرګی لاوروف سره به وویني.
د اغلې زاخارووا په وینا په دې غونډه کې به د روسیې، هند، چین، ایران، پاکستان، ازبکستان، قزاقستان، قرغیزستان، تاجکستان او ترکمنستان استازي ګډون وکړي.
هغې زیاته کړه چې داغونډه به چې د طالبانو د بهرنیو چارو سرپرست وزیرهم پکې ګډون کوي، د بهرنیو چارو وزیر سرګې لاوروف پرانیزي او له ښاغلي متقي سره به هم خبرې وکړي.
که څه هم د دې غونډې هیڅ یوه برخوال هیواد لکه د نورې نړۍ په څیر د طالبانو سرپرست حکومت تراوسه په رسمیت نه دی پیژندلی خو اړیکي یې ورسره ټینګې کړې دي.
متقي پرون د یوه پلاوي په مشرۍ مسکو ته لاړ چې سبا (جمعه) د مسکو فارمټ په شپږمه غونډه کې ګډون وکړي.
د مسکو فارمټ مخکینۍ غونډه د تیر کال په اکتوبر کې د تاتارستان په کازان کې جوړه شوې وه، چې د هند، ایران، قزاقستان، چین، قرغیزستان، پاکستان، ترکمنستان او ازبکستان استازو او همدارنګه د طالبانو استازو پکې ګډون کړی وو.
د مسکو فارمټ د افغانستان پر مسلو د بحث لپاره په ۲۰۱۷م کال کې رامنځته شوی دی.