تاند (دوشنبه، د سنبلې ۱۸ مه) پاکستان ادعا کوي چې د شنبې په ورځ د ځاځي میدان او کورمې ترمنځ د ډیورند کرښې په اوږدو کې د دوو خواوو د ځواکونو په نښته کې د طالبانو د دوو قوماندانانو په شمول اته تنه وژل شوي دي.
ډان ورځپاڼې نن د پاکستان د امنیتي سرچینو په قول ویلي چې په دې نښته کې، چې د دوی په ادعا افغان طالبانو پیل کړه، ۱۶ نور طالب ځواکونه ټپیان شوي دي.
ډان ورځپاڼه وايي، دوو سرچینو ورته وویل:«بل لوري (افغان) ته سخته مرګ ژوبله اوښتې. تراوسه پورې د پاکستاني ځواکونو په ځوابي برید کې ۸ افغان طالبان وژل شوي او ۱۶ نور ژوبل شوي دي.»
دا په داسي حال کې ده چې مخکې رسنیو راپور ورکړی و چې د طالبانو او پاکستاني پوله ساتو تر منځ نښته هغه وخت پیل شوه چې طالبانو غوښتل ۲ پوستې جوړې کړي او پاکستانیانو یې مخه نیوله. همداراز په افغانستان کې ځینو سرچینو اعلان کړی چې په دې جګړه کې د طالبانو یو امنیتي سرتېری وژل شوی او پنځه پاکستاني پوځیان هم ټپیان شوي دي.
سرچینو همداراز ویلي چې د یکشنبې په ورځ هم په ورته سیمه کې نښته روانه وه خو د یکشنبې د ورځې د مرګ ژوبلو کوم راپور نه شته.
د پاکستان پوځ یا نورو چارواکو په دې اړه تراوسه رسماً څه نه دي ویلي.
د افغان او پاکستاني ځواکونو د نښتو له کبله د ډیورند په دواړو خواوو کې ګڼ خلک مجبوره شوي چې له خپلومېنو ووځي.
په همدې حال کې په خوست کې د طالبانو مرستیال والي محبوب شاه قانت سرحدي ځواکونو ته امر کړی چې “پر افغان خاوره هر ډول یرغل ته ځواب ورکړي”.
ډان ته امنیتي سرچینو دا هم ویلي چې پرون د کورمې په مرغان سیمه کې د وسله والو مخالفانو په برید کې یو امنیتي سرتېری وژل شوی او ۳ نور ڼپیان شوي دي.