تاند (چهارشنبه، د سنبلې ۱۴ مه) د ملګرو ملتونو سرمنشي انتوني ګوتیریش کاناډایي ډيپلوماته جورجیت ګانون (Georgette Gagnon) په افغانستان کې د خپلې استازې د مرستیالې په توګه وګومارله.
میرمن ګانون به د جرمن ډيپلومات مارکس پوتزل ځای ونیسي.
ملګرو ملتونو نن (چهارشنبه) په یوه خبرپاڼه کې ویلي چې نوې ټاکل شوې استازې یې د سولې د ملاتړ، د بشري حقونو په برخه کې د ستراتیژیکو نوښتونو د لارښوونې او د جګړې او له جګړې وروسته وضعیت په اقداماتو کې ۲۸ کلنه کاري تجربه لري.
ګانون له ۲۰۲۱ کال را په دې خوا په لیبیا کې د ملګرو ملتونو د سرمنشي مرستیاله استازې پاتې شوې ده.
ملګرو ملتونو د افغانستان د سیاسي ماموریت یا یوناما د مشرتابه په جوړښت کې دغه بدلون وروسته تر هغه اعلان کړی چې طالبانو تېره میاشت کابل ته د بشري حقونو په برخه کې د ملګرو ملتونو د ځانګړي راپورتر ریچارد بېنیټ پر سفر بندیز ولګوه.
بینیټ ویلي، دی به له لرې د خپلو چاینلونو له لارې په افغانستان کې د بشري حقونو ارزونې ته دوام ورکړي.