_{تاند (شنبه، د سنبلې ۱۰ مه) د طالبانو په حکومت کې د پنجشیر ولایت پخوانپ امنیه قوماندان او د بدري قطعې قوماندان عبدالحمید خراساني هغه راپور او پروپاګند وباله چې کني نوموړی نیول شوی دی.}

_{ده ویلي چې هیڅ جرم یې نه دی کړی، او «د سیسټم او وروڼو» تر منځ غلط فهمي راپورته کیږی.}

_{له تېرو دوو ورځو راهیسې داسې راپورونه خپاره شوي چې خراساني نیول شوی او ملګري یې بې وسلې شوي دي.}

ده رسنیو ته ویلي و:«په کابل کې د طالبانو نظامي کمېسیون د پنجشنبې په ورځ لومړی هغه احضار او وروسته بیا کلا بند کړ.»
د نوموړي همداراز ویلي و چې طالبانو د ده ټول کسان بې وسلې کړي او دی یې د نظامي کمیسیون په دفتر کې نیولی دی.»

_{ویل کېږي چې نوموړي په خپله ځینو رسنیو ته د نیول کېدو اود ملګرو د بې وسلې کېدو ویلي دي. خو خراساني د پخوا په شان له خپلو خبرو په شا شوی دی. ده په ځلونو د طالبانو پر حکومت توندې نیوکې کړي او وروسته یې خپلې خبرې بېرته اخیستي دي.}

_{هغه په یوه صوتي پیغام کې چې بیلابیلو رسنیو ته یې استولی، ویلي چې منافقانو د هغه له اکاونټ څخه په ټولنیزو رسنیو کې د اسلامي امارت پر ضد تبلیغات کړي دي، چې دا د منافقانو کار دی، او هغه یې ردوی.}

_{خراساني په مکرر ډول وویل چې اسلامي امارت یو نظام دی، د هر چا کور دی، او هغه له کومې ستونزې سره مخامخ نه دی، مګر په نظام کې غلط فهمي راپورته کیږي.}