تاند(سې شنبه، د سنبلې ۶ که) د ملګرو ملتونو د خوړو او کرنې سازمان (FAO) نن (سې شنبې، د اګست ۲۷) پر خپله ایکسپاڼه کې لیکلي چې دوی «د ژمي د غنمو کمپاین» به له یو میلیون ټنو څخه زیات غنم راټول کړي، چې دا به په افغانستان کې د شاوخوا پنځه میلیونه خلکو اړتیاوې پوره کړي.
د ملګروملتو دې ادارې، په ورته وخت کې وویل، لږ تر لږه دوه میلیونه نورو خلکو ته د غنمو د رسولو لپاره ۳۰ میلیون ډالرو ته اړتیا لري.
د خوړو او کرنې سازمان دا هم ویلي چې ۳۰ میلیونه نورو خلکو ته د غنمو په رسولو کې د مرستې لپاره یې په بودجه کې ۳۰ میلیون ډالره کم دي.
د ملګرو ملتونو د خوړو او کرنې سازمان (FAO) همداراز کښلي چې تر راتلونکی کال پورې به له ۱ څخه تر ۱.۲ میلیون ټنو پورې غنم تولید کړی او د یو کال لپاره به ۴.۹ میلیون افغانانو ته خواړه ورکړي.
غنم د افغانستان په کرنه کې حیاتي رول لري او د ډېرو کورنیو لپاره د خوړو اصلي سرچینه ده. دا محصول د هیواد د کرنیز اقتصاد یوه لویه برخه جوړوي.
سږ کال د سختو بارانونو له امله، په ځینو سیمو کې فصلونه زیانمن شوي دي. اوسمهال افغانستان د اړتیا وړ غنم او اوړه له بهره په ځانګړې توګه قرغزستان څخه واردوي.