تاند (دوشنبه، د سنبلې ۵ مه) د طالبانو د ترانسپورت او هوايي چلن وزارت وايي، په ۲۴ ساعتونو کې د افغانستان له فضا ۲۶۵ الوتکې تېریږي.
د دغه وزارت عملیاتي مرستیال فتح الله منصور وايي، وړاندې تر دې د افغانستان پر فضا په ۲۴ ساعتونو کې شاوخوا ۱۱۰ الوتکې تېرېدې، خو اوس پرې ۲۶۵ الوتنې کیږي.
نوموړی وايي، له هرې الوتکې څخه ۷۰۰ امریکايي ډالر حق العبور اخیستل کېږي. د ایران او اسراییل ترمنځ د کړکېچ له زیاتېدو لسګونو هوايي شرکتونو خپل هوايي مسیرونه بدل کړي او له دې کبله پر افغانستان د تېرېدونکو الوتکو شمېر ډېر شوی دی.
د دغه وزارت چارواکو نن (دوشنبې)د خپلو کالنیو بریاوو په پروګرام کې وویل چې حاضردمه په افغانستان کې پنځه هوايي ډګرونه د نړیوالو الوتنو او ۲۷ الوتنو لپاره چمتو دي.
د دغه وزارت د مځکني ټرانسپورټ مرستیال وزیر عبدالسلام حیدري وویل، د پاکستان له حکومت سره یې د باري لاریو د تګ راتګ لپاره داسې سند لاسلیک کړی چې پاکستاني لارۍ افغانستان ته او د افغانستان لارۍ پاکستان ته مالونه وړي راوړي.
ده زیاته کړه، د پاکستان ۲۶۵۰ لاریو ته یې افغانستان ته د ورتګ اسناد ورکړي او د افغانستان ۵۱۰۰ لارۍ یې پاکستان ته ورپيژندلې چې پاکستان ته د ورتګ اجازه ورکړل شي.