تاند (شنبه، د سنبلې ۳ مه) د کاناډا حکومت له هغو افغان کډوالو سره نوره مالي مرسته نه کوي چې کاناډا ته د تلو لپاره په پاکستان کې انتظار باسي.
کاناډا هغو افغانانو ته د ویزې ژمنه کړې چې په افغانستان کې یې له کاناډایي ځواکونو سره کار کړی وي. ډېری دغه افغانان په افغانستان کې د طالبانو له بیا واکمنېدو وروسته پاکستان ته کډه شوي او کاناډا ته د انتقال په تمه دي.
راپورونه ښیي چې د کاناډا د کډوالۍ او میشتونې دفتر دغو افغانانو ته د لنډمهاله سرپناه پیسې چمتو کړي دي.
د سي بي سی خبري اژانس د راپور له مخې، د کاناډا حکومت اوس دغه پیسې بندې کړې دي. چارواکو سي بي سي ته وویل چې دا مالي ملاتړ د دې لپاره یو لنډمهاله اقدام او د لنډمهاله استوګنې د چمتو کولو لپاره یو استثنایی ګام و چې کډوال خپل اسناد بشپړ کړي.
اوس مهال زرګونه افغانان په ایران او په ځانګړي توګه په پاکستان کې د ایستلو په تمه دي. په دغو هیوادونو کې ډیری یې په ناامنه حالت کې دي.