تاند (سې شنبه، د اسد ۳۰ مه) د ایران له لوري له افغانستان سره په ګډه پوله د دوېوال د درولو په اړه د طالبانو حکومت په لومړني غبرګون کې وویل چې دا د ایران حق دی.
د تسنیم خبري اژانس د راپور له مخې، طالبانو د حکومت مرستیال ویندوی حمد الله فطرات وویل، “ایران غواړي چې په خپله خاوره کې پوله بنده کړي، دا د ایران حق دی چې دا پروژه اجرا کوي، او کولی شی د خپلو سرحدونو د ښه امنیت لپاره امنیتي ګامونه واخلي. ایران به د پولې د بندولو پروژه تطبیق له اسلامي امارت سره په موافقې او همغږۍ اجرا کړي.”
د ایران د پوځ د مځکنیو ځواکونو قوماندان سیروس امان الهي مخکې ویلي و: “د ایران او افغانستان ترمنځ د راکړو ورکړو او نورو تعاملاتو د کچې د زیاتوالي له امله، موږ په ګډو سرحدونو کې د امنیت د زیاتوالي شاهدان یوو، او د وسله والو او امنیتي ځواکونو په حضور امنیت دوه برابره ښه شوی دی.”
هغه د ایران ختیځې پولې ته د خپل سفر په ترڅ کې وویل: “د دې لپاره چې په ایران کې دننه دوامداره امنیت ډاډمن شي، له افغانستان سره د ایران د ۳۳۰ کیلومتره ختیځې پولې د بندولو پروژه به د دې کال تر پایه بشپړه شي.”
د ایراني چارواکي په وینا، په رضوي خراسان، جنوبي خراسان، او سیستان او بلوچستان ولایتونو کې د سرحدونو د بندولو چارې به په راتلونکو دریو کلونو کې بشپړې شي.
ایران په وروستیو کې د افغان کډوالو د نیولو او افغانستان ته د راستنولو بهیر چټک کړی دی خو یو شمېر ایراني چارواکي وايي، تر څو چې یې خپلې پولې بشپړې کنټرول کړي نه وي، د کډوالو د ورتګ ستونزه نه حل کېږي.
د طالبانو له واک ته رسیدو وروسته، په افغانستان کې د بې روزګارۍ د ډېرېدو او اقتصادي بحران له کبله میلیونونه افغانان ایران ته ولاړل چې له کبله یې په ایران کې له افغانانو سره عمومي حساسیت زیات شوی دی.
ښه کار دی خو چی همسایه هیواد سره په مشوری کی وشی ـ