تاند (جمعه، د اسد ۲۵ مه) د ترکمنستان لپاره د ټاپي پایپ لاین پروژې رییس محمد مراد امانوف او په افغانستان کې د ترکمنستان سفیر خوجه عوضوف د افغانستان د طالبانو د حکومت له بهرنیو چارو وزیر امیرخان متقی سره په کتنه کې د ټاپی نللیکې پروژې په اړه خبرې وکړې.
د تریند خبري اژانس د راپور له مخې، په دې کتنه کې د ټاپي رییس په افغانستان کې د پروژې د اوسني وضعیت او د هغې د پیل لپاره د پلانونو په اړه تازه معلومات وړاندې کړل او له افغان لوري څخه یې د لا نورو همکاریو غوښتنه وکړه.
د طالبانو د باندنیو چارو وزیر د ټاپي پروژې د عملي کولو لپاره د هڅو ستاینه وکړه او د افغانستان له لوري یې د بشپړ ملاتړ ډاډ ورکړ او ټینګار یې وکړ چې په هیواد کې د ټاپي نللیکې جوړول یو له لومړیتوبونو څخه دی.
متقي یادونه وکړه چې افغان ادارو خپل چمتووالی بشپړ کړی او د عملي کار د پیل کولو لپاره یې خوشبیني څرګنده کړې ده.
سربیره پردې، امانوف تایید کړه چې ترکمنستان لا دمخه له افغانستان سره خپلې پولې ته پایپ لاین غځولی او د افغانستان خاورې ته د غځولو لپاره چمتووالی نژدې بشپړ شوی.
د ترکمنستان – افغانستان – پاکستان – هند (تاپي) پایپ لاین یوه لویه پروژه ده چې د جوړېدو په صورت کې به له ترکمنستان څخه طبیعي ګاز د افغانستان او پاکستان له لارې هند ته لیږدوي.
تمه کیږي چې په کال کې ۳۳ میلیارد مکعب متره ګاز په دې نللیکه کې ولېږدول شي.
د دې پروژې پر جوړولو په ترکمنستان کې د ۲۰۱۵ د دسمبر په دیارلسمه کار پیل شو.
ترکمنستان د ګازو ډېر ګاز لري او غواړي چې د دې نللیکې په وسیله یې هند او پاکستان ته صادر کړي.
د تېر جمهوري حکومت په مهال امنیتي ستونزې د افغانستان په خاوره کې د دې پایپ لاین د جوړېدو خنډ وې، خو اوس بیا سیاسي بې ثباتي د ټاپي مخه نیولې ده. په افغانستان کې د مشروع او په رسمیت پېژندل شوي حکومت د نشتوالي له کبله ستر پانګوونکي زړه نه شي ښه کولی چې په دومره ستره پروژه کې پانګونه وکړي.