تاند (چهارشنبه -د اسد ٢۴) پاکستاني چارواکو ویلي، چې د کراچۍ په هوایي ډګر کې یې ۱۱ هغه کسان نیولي، چې په جعلي ټکټونو یې سعودي عربستان ته د عمرې د حج لپاره د سفر تابیا کړې وه.
د پاکستاني رسنیو د معلوماتو له مخې، په دغو کسانو کې ۸ تنه یې ښځې دي.
ویل شوي چې نیول شوي کسان ټول د پاکستان د پنجاب ایالت اوسیدونکي دي.
ډان ورځپاڼې ويلي، د منځني ختيځ هيوادونو ته د تلونکو پاکستاني خېرات غوښتونکو شمېر زیات شوی او د مخنيوي په لړ کې یې په تېرو څو مياشتو کې ګڼ مسافر د الوتکو څخه کوز کړل شوي دي.
ویل شوي، دغه خېرات غوښتونکي په ممکنه توګه سعودي عرب، متحده عرب اماراتو، عراق، ايران، عمان او ترکي ته د سېل په بهانه ځي.
د راپورونو له مخې، په ګڼو هېوادونو کې د خیر غوښتلو له امله نیول شوي ۹۰ سلنه بهرني وګړي پاکستانیان دي