تاند (سې شنبه، د اسد ۱۶ مه) د افغانستان د اوبو او انرژۍ سرپرست وزیر عبدالتیف منصور وايي، د افغانستان او ازبکستان تر منځ پوله د سېلونو له امله مینځل شوې او بیا به مشخصه شي.
د منځنۍ اسیا د اې کې آی پریس اژانس د راپور له مخې، منصور وویل، د افغانستان، تاجکستان، ازبکستان او ترکمنستان ترمنځ د سرحدونو د ټاکلو چارې به، چې له سیلونو وروسته ناڅرګندې شوي، د یوې نوې ستراتیژۍ له مخې ترسره شی.
منصور وویل، د افغانستان د مشر په لارښوونه جوړ شوی پلان به د کورنیو چارو وزارت، د استخباراتو ریاست او د بهرنیو چارو وزارت په همکارۍ عملي شی.
ده زیاته کړه:«له تاجکستان، ازبکستان او ترکمنستان سره زموږ پولې (د پولو نښې) د سیلونو له امله پاکې شوې. دا مهمه ده چې موږ د پخوانیو سرحدونو په ټاکلو او معلومولو کار وکړو، ۲۰ ورځې وړاندې مو پر دې موضوع له افغان مشر (هبة الله اخوندزاده) سره خبرې وکړې.»
نوموړی د سرحدونو د بیارغونې د نوې ستراتیژۍ په اړه جزئیات ورنه کړل.
د تېر جمهوري حکومت په مهال په ځلونو د افغانستان لور ته د امو دریا د راشیوه کېدو په اړه راپورونه خپاره شول او ځايي اوسیدونکي وايي، هر کال امو دریا د افغانستان لور ته پراخیږي چې ورسره د افغان کروندګرو زرګونه جریبه مځکه لاندې کوي او یا د منځنۍ اسیا د درو هیوادونو خوا ته پاته کېږي. دوی همداراز وايي د منځنۍ اسیا هیوادونه د افغانستان د خاورې همدا برخه له خپلې خاورې سره یوځای کوي.