تاند (سې شنبه، د اسد ۱۶ مه) په داسي حال کې چې ایراني چارواکي د افغانستان پولې ته څېرمه په دوغارون کې د لګېدلي اور په نتیجه کې د ۴ ټانکرونو د سوځېدو خبره کوي، ایرنا خبري اژانس وايي چې په دې ځای کې تر ۵۰۰ ډېر ټانکرونه سوځېدلي او لږترلږه یو افغان موټرچلوونکی مړ شوی دی.
ایراني چارواکي وايي چې د افغانستان پولې ته نژدې یې په دوغارون کې لګېدلی اور له څو ساعتونو وروسته وژلی دی.
پرون (دوشنبې) په دوغارون کې د افغانستان او ایران د ځانګړي اقتصادی زون د تیلو په ټانکونو کې پراخ اور ولګېد.
تسنیم خبري اژانس پرون (دوشنبې) وویل چې په اور کې څلور کسان ټپیان شوي او ۴ ټانکرونه سوځېدلي چې یو یې د افغانانو دی.
تسنیم خبري اژانس د تایباد د چارواکو په قول ویلي چې د اور وژلو په عملیاتو کې د افغانستان د اسلام کلا بندر اطفایې هم برخه واخیسته.
د تسنیم پر اساس، په دې پېښه کې څلور ټانکرونه سوځېدلي چې درې د ایرانیانو او یو د افغانانو و.
ایراني چارواکي وايي چې د افغانستان پولې ته څېرمه په دوغارون کې یې لګېدلی اور وژلی دی. د اور وژنې په عملیاتو کې د اسلام کلا اطفایې هم برخه واخیسته. په دې پېښّ کې ۴ ټانکرونه سوځېدلي دي. pic.twitter.com/rJtXnG5Uvk
— taand.net (@TaandNet) August 5, 2024
ایراني چارواکو ویلي چې د یوه موټر د بیټرۍ د شارتۍ له کبله اور ولګېد.
خو د ځانګړي اقتصادي زون اجرايي ريیسه مریم قوي دل وايي چې څو عوامل سبب شول چې اور ولګېږي. د هغې په باور د یوه ټانکر د برق ستونزه سبب شوه چې چاودنه وشي. دې د پېښې په ځای کې د نل د لیک کېدو او نورو ستونرو یادونه هم وکړه.
هغه افغانان، چې تېل یې اخیستي وو، وايي چې ګومان کېږي د دې اور لګېدو له کبله تر ۵۰ میلیون ډالره زیات زیات اوښتی وي.
د اور وژلو لپاره له اسلام کلا او هرات ښاره هم د اطفایې موترونه د پېښې ځای ته ورسیدل او په اور وژلو کې یې مرسته وکړه.
د تایباد مرستیال ولسوال محمدرضا رضايي وايي چې د دې پېښې په تړاو د تېلو درې ایراني او یو افغان کاروباریان نیول شوي ځکه چې پر هغوی تور دی چې د خوندیتوب مقررات یې نه دي رعایت کړي.
وروستي راپورونه وايي چې ممکن په دې پېښه کې تر ۵۰ میلیون ډالره زیات تاوان اوښتی وي pic.twitter.com/2aekVoci3v
— taand.net (@TaandNet) August 5, 2024