تاند (یکشنبه، د اسد ۷ مه) د افغانستان د سوداګرۍ او صنایعو وزارت وايي، افغانستان د ۲۰۲۴ کال له جنورۍ څخه تر جون پورې د ۵،۲۴ میلیارد ډالرو په ارزښت سوداګریز توکي صادر او وارد کړي دي.
د دغه وزارت ویاند اخوندزاده عبدالسلام جواد ځايي رسنیو ته ویلي، افغانستان د ۲۰۲۴ کال په لومړیو شپږو میاشتو کې د شاوخوا ۷۰۰ میلیون ډالرو په ارزښت بېلابېلو هېوادونو ته صادرات کړي، چې د هغو له منځه د ۵۸ میلیون ډالر صادرات یې د منځنۍ اسیا هېوادونو ته کړي دي.
د افغانستان د احصایې او معلوماتو ملي ادارې د جولای په میاشت کې راپور ورکړ چې د افغانستان محصولات تر ډېره پاکستان، هند او ایران ته صادرېدل او د وارداتو عمده سرچینې ایران، پاکستان او چین دي.
تازه او وچه میوه لکه پسته، جلغوزې، انځر، انار، انګور، ممیز، خټکي او هندواڼه د افغانستان تر ټولو مهم صادراتي محصولات دي.