تاند (یکشنبه، د اسد ۷ مه) د سربیا تلویزیون پرون (شنبې) وویل چې د دغه هیواد په جنوب ختیځ کې د یوه موټر د چپه کېدو په پېښه کې ۳۰ تنه افغان او نیپالي پناه غوښتونکي ټپیان شوي دي.
د راپور له مخې، له درو تنو پرته چې په روغتون کې پاته شول، د نورو ټپونه برسېرن وو او ژر له روغتونه رخصت شول.
دا پېښه د جمعې په ورځ بیلا پالانکا ښارګي ته نژدې په لویه لاره کې وشوه.
سربیا لوېدیځې اروپا ته د تلونکو پناه غوښتونکو په لار کې ده.
په ۲۰۲۳ کال کې نژدې سل زره پناه غوښتونکي د سربیا له لارې د اروپايي اتحادیې غړیو هیوادونو ته تېر شوي وو.