تاند (پنجشنبه، د اسد ۴ مه) د طالبانو د استخباراتو لوی رئیس مولوي عبدالحق وثیق په یوه کم ساري اقدام کې د یوې اعلامیې له خپرولو سره په افغانستان کې د بېلابېلو ترهګرو ډلو د حضور ادعاوې رد کړې دي.

نوموړي په دې اعلامیه کې ویلي، چې دغه ادعاوې د دوی خلاف تبلیغات دي او واقعیت نه لري.

ملا وثیق له نړیوالو غوښتي، چې د ده په ټکیو په داسې تبلیغاتو تېر نه وځي او باور پرې ونه کړي.

دا په داسې حال کې ده، چې په وروستیو کې پر افغانستان د طالبانو د واکمن رژیم تر ټولو نږدې ملګری هېواد پاکستان د دوی خلاف ورته تورونه په مکرر ډول تکراروي او نن یې دا تورونه د صدراعظم شهباز شریف لخوا هم پورې شوي.

په افغانستان کې واکمن طالبان بیا ردوي، چې ګواکې پاکستاني طالبانو او نورو ډلو ته یې پناه ورکړې او هغوی د خپلو موخو لپاره له افغان خاورې استفاده کوي.