تاند (سې شنبه، د اسد ۲ مه) د طالبانو حکومت وايي چې په هرات ولایت کې یې د سلمان بند اوبه د پنځو ولسوالیو د کرنیزو مځکو د خړوبولو لپاره خوشي کړي دي.
سلما بند، چې د جمهوري حکومت په مهال د هند په مرسته جوړ شو، اساساً د اوبه خور لپاره جوړ شوی او یوه اندازه برېښنا هم تولیدولی شي.
باختر خبري اژانس نن د طالب چارواکو له خولې راپور ورکړ چې د دغه بند اوبه د اوبه (اوبې)، چشت شریف، پښتون زرغون، انجيل او ګذرې ولسواليو ته پرېښودل شوې دي.
د خبر پر اساس، د هریرود- مرغاب د سیندي حوزې مسوولانو وویل چې په دغو ولسوالیو کې د اوبو له درې بندونو څخه په هره ثانیه کې ۶۰ متر مکعب اوبه کروندګرو ته رسېږي.
ویل شوي چې د سلما بند اوبه د کروندګرو د هوساینې او د خلکو په سلا خوشې شوې دي.
د سلما بند د افغانستان په لوېدیځ کې د هریرود او مرغاب په سیندي حوزو کې د هېواد له مهمو بندونو څخه دی.