تاند (چهارشنبه، د سرطان ۶ مه) په تېره یوه لسیزه کې په نړیواله کچه د خلکو منفي احساسات کم شوي او افغانستان د خلکو د منفي احساساتو له امله د نړۍ تر ټولو بد هېواد نه دی پاتې شوی. دغه رتبه اوس افریقايي هیواد ګیني ترلاسه کړې ده.
د نن ورځې د ژوند تجربو ته په کتو افغانان د تېر په څېر نا امیده نه ول، خو د ګالپ په لیست کې د افغانانو تجربې لا هم په نړۍ کې تر ټولو منفي وې.
په دې نوملړ کې افغانستان د ۲۰۲۱،۲۰۲۲ او۲۰۲۳ کلونو پرتله ښه و، خو افغانستان د نړۍ په کچه په ۳۸م نمبر یا تر ټولو لاندې دی او ګالپ وايي، ډېری افغانان په بې وزلۍ کې ژوند کوي.
د ګالپ نظرپوښتنې موندلې چې افغانان ژوند دومره خراب بولي چې هغه ته مصیبت ویل کېدای شي.
دا سروې وايي، که په افغانستان کې د خلکو په احساساتو کې بدلون راغلی وي، د نارینه وو احساسات ښه شوي دي.
د ګالپ د انډیکس له مخې، په افغانستان کې په ۲۰۲۳ کال کې د نارینه وو په منځ کې د ښه احساس کچه ۴۲ او په ښځو کې ۳۴ وه. په ۲۰۱۷ کال کې افغانستان د مثبتو احساساتو له مخې د نړۍ تر ټولو بد هېواد و.
د ګالپ په نامه د رای ورکولو نړیوال سازمان د ۲۰۲۴ کال په راپور کې د افغانستان په ګډون د نړۍ د ځینو هېوادونو د خلکو د احساساتو په اړه دا راپور خپور کړی دی.
په نظرپوښتنه کې په ۲۰۲۳ کال کې په ۱۴۲ هېوادونو کې له ۱۴۶ زره کسانو سره مرکې شوي او د هغوی د ورځني ژوند د تجربو په اړه پوښتنې شوې دي.
په ۲۰۲۳ کې، ۳۶٪ لویانو وویل چې دوی د اندیښنې احساس کوي. دا اندازه د تېر کال پرتله درې درجې کمه وه، خو لس کاله وړاندې دا اندازه ۳۳ سلنه وه.
د خلکو د منفي تجربو له مخې ګیني او اسراییل تر افغانستان مخکې وو.
په ۲۰۲۱ کې، په ګینې کې له پوځي کودتا وروسته سیاسي ناڅرګندتیا زیاته شوه، او د ګالپ نظرپوښتنې له مخې، د منفي احساساتو له مخې، په ۲۰۲۳ کې، هیواد لومړی ځای لري چې ۵۳ سلنه خلک منفي احساسات لري. د ۲۰۲۲ او ۲۰۲۳ ترمنځ، په ګینې کې د فشار په کچه کې ۱۰ سلنه زیاتوالی لیدل شوی.
په اسراییل کې، ګالپ خپله ټولپوښتنه د اسراییل او حماس د جګړې له پیل څخه دوه اونۍ وروسته ترسره کړه.
اسراییل له افغانستان او لایبریا سره مساوي وو. په درې واړو هېوادونو کې د خلکو د منفي احساساتو کچه ۴۷ سلنه وه.
په ۲۰۲۲ کې، اسراییل د نړۍ یو له هغو هیوادونو څخه و چې د منفي عامه احساساتو ټیټه کچه لري.
وروسته له هغه چې فلسطیني وسله والې ډلې حماس د اکتوبر په اوومه نېټه پر اسراییل برید وکړ، د اسراییل د خلکو د منفي احساساتو کچه لوړه شوه. د ګالپ نظر پوښتنه ښيي چې ۶۷ سلنه اسراییلیان د وېرې احساس کوي، ۶۲ سلنه د فشار احساس کوي او ۵۱ سلنه اسراییلیان د خپګان احساس کوي، چې دا ډول احساسات غیر معمولي دي.