تاند (یکشنبه، د جوزا ۱۳ مه) د طالبانو تر واک لاندې باختر خبري اژانس له پاکستان او ایران څخه په یوه ورځ کې د دوه زرو افغان کډوالو د شړلو خبر ورکړی.
سرچینې زیاته کړې، چې دا کدوال د ننګرهار، کندهار، نیمروز او هرات ولایتونو له لارې خپل هېواد ته ستانه شوي.
طالب چارواکو دغو را ستنو شویو کورنیو سره د مرستو یادونه نه ده کړې.
په وروستیو کې بیا ایران او پاکستان د افغان کډوالو را شړل زیات کړي، چې ورسره په افغانستان کې د دوی او نورو خلکو د ژوند د شرایطو خرابیدو اندېښنې زیاتې شوي.
هېواد ته ستنیدونکي افغان کډوال د سرپناه د نشتوالي تر څنګ له اقتصادي او کاري ستونزو شکایتونه لري.
سربېره پر دې افغانستان یو کمساری بشري – اقتصادي ناورین تجربه کوي او د نړیوالو ادارو د ارزونو له مخې، تر ۲۳ میلیونو پورې خلک یې بشري مرستو ته اړ دي.
د طالبانو پر رژیم نیوکې دي، چې نه یوازې د دغو شرایطو د بهترۍ کوم عملي اراده او نړیوالو سره پرې د خبرو ظرفیت او تعهد نه لري؛ بلکې له ګاونډیو هېوادونو د کډوالو د شړلو د مخنیوي لپاره هم مسوولانه اقدامات نه شي کولای.