تاند (یکشنبه، د جوزا ۱۳ مه) د افغانستان لپاره د اروپايي ټولنې ځانګړي استازي توماس نیکلاسن پرون کابل ته د سفر پر مهال د طالبانو د بهرنیو چارو وزیر ملا امیرخان متقي سره د دوحې د درېیمې ناستې په اړه خبرې کړي.
طالبانو په یوه اعلامیه کې ویلي، چې وزیر یې په یاده ناسته کې د ګډون په اړه د خپل رژیم پرېکړه پر« مانا داره ګډون» مشروطه کړې او ویلي، چې د ناستې له څرنګوالي څېړلو وروسته به په دې تړاو پرېکړه کوي.
طالب وزیر دا هم ویلي، چې په کابل کې د ملګرو ملتونو د سرمنشي له مرستیالې روزمري ډیکارلو سره یې ګټورې خبرې کړې دي.
د طالبانو په اعلامیه کې د اروپایي ټولنې د استازي څرګندونې نه دي نقل قول شوي.
په پام کې ده، چې د افغانستان په اړه د دوحې درېیمه ناسته د روانې میلادي میاشتې په پای کې د ملګرو ملتونو په کوربه توب جوړه او پکې افغانستان سره د نړیوال تعامل پر څرنګوالي او د طالب رژیم د رسمیت موندلو د بهیر په اړه خبرې وشي.
طالبانو د دوحې دویمه ناسته تحریم کړې وه، خو درېیمه کې یې د ګډون نښې نښانې څرګندې شوې دي.