تاند (جمعه، د ثور ۲۸ مه) یو موټر چې کډوال پکې سپاره وو، پرون (پنجشنبې) د کرویشیا په جنوب کې له سړکه ووت او پر یوه دېوال ولګېد.
د اسوشیتید پریس خبري اژانس د راپور له مخې، په دې پېښه کې ۴ تنه مړه او د دوو ماشومانو په ګډون ۵ نور سخت ژوبل شول.
د پولیسو یوه چارواکي په یوه خبري غونډه کې وویل چې د موټر چلوونکی، چې د مولداویا تابعیت لري، له درو پناه غوښتونکو سره مړ شوی دی.
د ده په وینا د پناه غوښتونکو ملیت لا څرګند نه دی.
پېښه د اروپا په وخت تېر ماښام شاوخوا ۷ بجې د بوسنیا له پولې ۲۰ کیلومتره لېرې سیني ښارګي ته نژدې وشوه.
راپورونه وايي، د موټر چلوونکي هغه مهال کنټرول له لاسه ورکړ چې په یوه چوک کې د پولیسو موټر ورسره مخامخ شو.
د پولیسو چارواکي سرادارویچ رسنیو ته وویل چې په ټپیانو کې دوه ماشومان دي چې د یوه عمر ۱۲ او د بل ۱۵ دی او باور کېږي چې افغانان دي.
د کرویشیا رسنیو بیا ویلي چې د غیرقانوني کډوالو موټر چلوونکي غوښتل چې له پولیسو وتښتي خو وارخطا شو او موټر یې له دېوال سره ټکر کړ.