تاند (دوشنبه، د ثور ۲۳ مه) لومړنی انسان چې د خوک یا خنزیر پښتورګی ورته پیوند شوی و، له پیونده دوې میاشتې وروسته مړ شو.
د امریکا د باسټن د ماساچوسیت عمومي روغتون د شنبې په ماښام په یوه خبرپاڼه کې وویل:«د ماساچوسیت د عامه روغتون کارکوونکي د ریک سلیمن په ناببره مړینه د زړه له کومي خواشیني دي. داسي هیڅ نښه مو نه ده موندلې چې هغه دې د پښتورګي د پیوند له کبله مړ شوی وي.»
د فرانس پریس خبري اژانس د راپور له مخې، د ماساچوسیت روغتون جراحانو د مارچ په میاشت کې په نړۍ کې په لومړي وار د خوک پښتورګی، چې جنیټیک یې وراصلاح کړی و، ۶۲ کلن سلیمن ته پیوند کړ. د نوموړي پښتورګي له کاره لوېدلي وو او مرګي حاله و.
ماساچوسیت روغتون د سلیمن د مړینې په خبرپاڼه کې ویلي چې د نوموړي د پښتورګي بریالی پیوند په درسته نړۍ کې د ګڼو انسانانو لپاره چې پښتورګي ته اړتیا لري، یوه هیله غوړولې وه.
د سلیمن د پیوند له بریالیتوبه وروسته د پښتورګي تر ۱۴۰۰ ډېرو ناروغانو د پیوند لپاره خپل نومونه ولیکل او د انتظار په لیست کې ثبت شول.