تاند ( ۲ شنبه، د ثور ۱۷ مه ) په کابل کې د ایران د سفارت مرستیال سید حسن مرتضوي وایي، چې د اسراییلو پر ضد له دوی څخه د طالبانو د رژیم ملاتړ مسلمان هېوادونه هیله من کړي.
نوموړي د طالبانو د اقتصاد وزیر قاري دین محمد حنیف سره د لیدنې پر مهال دا خبره کړې، خو نه یې دي ویلي چې مسلمان هېوادونه د ده په وینا، ولې او څه ته هیله من شوي؟
مخکې د افغانستان لپاره د ایران د ولسمشر ځانګړي استازي او په کابل کې یې د سفارت سرپرست حسن کاظمي قمي ویلي وو، چې له افغانستان څخه د اړتیا پر مهال د ځانمرګو بریدګرو لښکرې به د فلسطین د دفاع لپاره غزې ته لاړ شي.
د طالبانو رژیم تر اوسه هم د نوموړي دغو څرګندونو ته غبرګون نه دی ښودلی.
ایران سره له دې چې طالبانو سره د ملاتړ خبرې کوي، خو په خپله خاوره کې یې د دوی د رژیم یو شمېر وسله والو او سیاسي مخالفانو ته پناه او د فعالیتونو اجازه ورکړې ده.
دغه هېواد تورن دی، چې په ټوله کې افغانستان او له هغې ډلې یې واکمن رژیم سره دوه ګونې لوبه کوي او د خپلو سیمه ییزو او نورو موخو لپاره ګټه ورڅخه اخلي.