تاند (یکشنبه، د ثور ۱۶ مه) ایمل ولي خان د عوامي نشنل ګوند په خپلمنځي انتخاباتو کې د دغه ګوند مشر او ډاکتر محمدسلیم خان عمومي منشي وټاکل شول.
په ګوندي انتخاباتو کې، چې نن په پېښور کې وشول، د ایمل ولي خان په وړاندې څوک نه و کاندید شوي.
تر دې مخکې اسفندیار ولي خان د عوامي نشنل ګوند مشر و خو له ډېرې مودې راهیسي نوموړی ناروغ دی او عملاً یې ګوندي چارو ته شا اړولې وه له همدې کبله د پاکستان په وروستیو انتخاباتو کې د عوامي نشنل ګوند د ماتې له کبله د ګوند مرستیال حیدرخان هوتي استعفا ورکړه.
ایمل ولي خان، چې تر دې مخکې د نشنل عوامي ګوند صوبايي مشر و، حاضردمه د پاکستان د سنا جرګې غړی دی.
د ده پر ځای میاافتخار حسین د ګوند صوبايي مشر ټاکل شوی دی.
د عوامي نشنل ګوند له خبرپاڼې سره سم، اسفندیار ولي خان به د ګوند «رهبر» وي چې یو سمبولیک لقب دی.