تاند: (۵ شنبه، د ثور ۱۳ مه) د پاکستان او پر افغانستان د طالبانو د رژیم د ظاهراً ناندریزو اړیکو په دوام، پاکستان په هرات کې د اوړمې ورځې د پېښې له امله د طالب رژیم پر ځای عامو افغانانو ته تسلیت ویلی.
د هرات ولایت د ګذرې ولسوالۍ د شهرک سیمې په جومات کې پر لمونځ کوونکو د دوشنبې شپې د ډزو په پېښه کې لږترلږه اووه کسان ووژل شول.
د یادې پېښې مسوولیت داعش ډلې پر غاړه اخیستی.
د دې پېښې په غبرګون کې، د پاکستان د بهرنیو چارو وزارت په اعلامیه کې راغلي: د پاکستان ولس او حکومت د ترهګري په دي پيښه د افغانستان خلکو ته د تسلیت پیغام رسول غواړي.
د پاکستان مشهور خبریال طاهر خان په دې اړه په خپله ایکس پاڼه کې لیکلي: د پاکستان او افغان حکومت ترمنځ د خرابو تعلقاتو اندازه د بهرنيو چارو د وزارت لاندي بيان څخه لګولي شي.
دا پېښه داسې مهال شوې، چې د طالبانو د بهرنیو چارو وزیر ملا امیرخان متقي تېره اوونۍ له مشخص نوم اخیستو پرته د افغانستان ۳ ګاونډي هېوادونه د داعش ډلې په ملاتړ تورن کړل.
د طالبانو ځینو پلویانو بیا وویل، چې له دغو هېوادونو د متقي هدف پاکستان، ایران او تاجکستان هېوادونه دي.