تاند (۳ شنبه، د ثور ۱۱ مه) د افغانستان لپاره د ایران د ولسمشر ځانګړي استازي او په کابل کې یې د سفارت سرپرست حسن کاظمي قمي په یوه تازه مرکه کې د طالبانو پر رژیم تازه فشارونه اچولي.
نوموړي د کابل له یوې خصوصي رسنۍ سره خبرو کې ویلي، چې دوی د افغانستان لپاره د ملګرو ملتونو د بل ځانګړي استازي د ګومارل کېدو مشروط ملاتړ کوي.
هغه زیاته کړې، چې د دغه استازي صلاحیتونه باید روښانه شي.
ایراني استازي دغه راز ویلي، چې د افغانستان په خاوره کې د ترهګریزو فعالیتونو په اړه د دوی اندېښنې پر ځای دي او په دې باید څوک خواشیني نه شي.
قمي دا خبره، پاکستان ته د ایران د ولسمشر د سفر او په ترڅ کې یې د افغانستان له خاورې د ترهګرو ډلو د ادعا شویو فعالیتونو په اړه د ایران او پاکستان د ګډو اندېښنو د اعلامیې په دفاع کې کړې ده.
د ایران سفیر په ورته وخت کې تایید کړه، چې د طالبانو د رژیم مخالفانو ته دوی پناه ورکړې او هغوی هلته دفترونه او د طالبانو خلاف فعالیتونه لري.
د ده په وینا، دوی له ټولو افغان لوریو سره اړیکې ساتي او بیا به هم دغو اړیکو ته دوام ورکوي.
کاظمي قمي دا هم وویل، چې د طالبانو رژیم به تر هغې دوی په رسمیت ونه پېژني، چې د افغانانو لخوا مشروعیت ترلاسه نه کړي او ټولې خواوې پکې ونه لیدل شي.
طالبانو د نوموړي څرګندونو ته غبرګون نه دی ښودلی.
تر دې مخکې ایران داعش سره د تړاو په تور د طالبانو د یوې مخالفې جنګي ډلې ( مقاومت جبهې) ۴ تنه بندي کړي غړي بېرته خوشې کړي وو، چې ویل کیږي د طالبانو د اعتراض سبب شوي وو.
ایران پرون له افغانستان سره پر ګډه پوله د دېوال او موانع جوړولو اعلان هم وکړ، چې طالبانو لا غبرګون نه دی ور ته ښودلی.