تاند(جمعه، د حمل ۳۰ مه) په پاکستان کې پر چینایي وګړو له څه موده وړاندې برید وروسته، دا ځل په دغه هېواد کې د جاپاني وګړو یو موټر د هدف وړ ګرځېدلی او ۲ جاپاني وګړي پکې وژل شوي دي.
پاکستاني رسنیو او سرچینو ویلي، چې دغه برید د یاد شوي هېواد د کراچۍ ښار په یوه سیمه کې ترسره شوی.
د پاکستان پولیس چارواکو ویلي، چې له دغه برید سره سم دوی ۲ بریدګران وژلي.
پاکستاني پولیسو دا برید د « ترهګرو» کار ګڼلی، خو نه یې دي ویلي چې د کومې مشخصې ډلې اړوند وو.
د برید مسوولیت لا کومې ډلې پر غاړه نه دی اخیستی.
څه موده وړاندې، د پښتونخوا په شانګله سیمه کې د اوبو د یوه جوړیدونکي بند پر چینایي انجینرانو برید شوی و، چې پکې تر ۵ پورې چینایي انجینران وژل شوي وو.
د یاد شوي برید مسوولیت بلوڅ بیلتون پالو پر غاړه اخیستی و.