تاند (پنجشنبه، د حمل ۲۹ مه) د ورلډ پریس فوټو بنسټ د رویټرز خبري اژانس د عکاس له لوري د دې فلسطینۍ ښځې عکس د ۲۰۲۴ کال تر ټولو ښه خبري عکس غوره کړ.
دا عکس د نړۍ د ۱۳۰ هیوادونو د ۳۸۰۰ عکاسانو د زرګونو عکسونو په منځ کې، چې د سږنۍ جایزې لپاره وړاندې شوي وو، غوره شو.
د رویټرز فوټو ژورنالیست محمد سالم د یوې ۳۶ کلنې فلسطینۍ ښځې، چې ایناس ابو معمر نومېږي عکس په داسي حال کې اخیستی چې په کفن کې پېچلی ماشوم یې په غېږ کې دی.
د رویټرز پر اساس، پنځه کلن ماشوم له خپلې مور او خور سره د تېر کال د اکتوبر په میاشت کې په خان یونس ښار کې د اسراییل په بمبارۍ کې وژل شوی و.
دا عکس پر غزې د اسراییل تر یرغل لس ورځې مخکې د خان یونس په روغتون کې اخیستل شوی دی.