تاند (چهارشنبه، د حمل ۲۲ مه) په کندهار کې د طالبانو د مشر ملا هبت الله اخوندزاده په امامتۍ د کوچني اختر لمونځ د زرګونو کسانو په ګډون ادا شو.
د طالبانو ویندوی ذبیح الله مجاهد پر خپله ایکسپاڼه کې د لمانځه عکس خپور کړی خو په خپله د هبت الله اخوندزاده تصویر پکې نه لیدل کېږي ځکه چې عکس له لېري اخیستل شوی دی.
طالبانو د اختر تر لمونځ مخکې په کندهار کې کلک امنیتي تدابیر غوره کړي و او ځینو رسنیو ویلي و چې طالبان د داعش د حملې اندېښنه لري.
نه یوازې په کندهار بلکې د افغانستان له هیڅ ولایت څخه د کومې امنیتي پېښې خبر نه دی ورکړل شوی. په کابل او نورو ولایتونو کې هم خلکو د اختر لمونځ له هر راز امنیتي پېښو لېرې ادا کړ.