تاند (۵ شنبه، د حمل ۱۶ مه) په کابل کې د پاکستان سفارت له مرستیال شارژدافیر جنید وزیري، په پاکستان کې د افغان کډوالو د معلومات ټولولو روان بهیر ته په اشارې ویلي، چې د دوی د ایستو لپاره دستي کوم ضرب الاجل نه دی ټاکل شوی او یوازې معلومات یې را ټولیږي.
د کډوالو او راستنېدونکو چارو وزارت لپاره د طالبانو مطبوعاتي دفتر ویلي، چې نوموړي دا څرګندونې د دغه وزارت له مسلکي مرستیال سره د لیدنې پر مهال کړې دي.
په یاده لیدنه کې پاکستان کې د افغان کډوالو په ستونزو، تګ راتګ کې په اسانتیاوو او ځانګړي ډول سږ کال له دې هېواد څخه د حج لپاره تلونکو افغان کډوالو ته د وېزو او نورو اسانتیاوو په چمتو کولو خبرې شوې دي.
د کډوالو چارو وزارت لپاره د طالبانو د رژیم مسلکي مرستیال او سرپرست ویلي، چې د کډوالو موضوع دوه اړخیزه موضوع ده او د دوی په اړه پرېکړې هم باید ددواړو هېوادونو په تفاهم سره وشي. دغهراز د یوه ګډ میکانیزم تر رامنځته کولو پورې باید دوی ونه ځورول شي.
د پاکستان سفارت مرستیال شارژدافیر افغان حاجیانو ته د تګ راتګ اسانتیاوو برابرولو لپاره چمتووالی ښودلی .
نوموړي زیاته کړې، چې یاد اړین موضوعات به له اسلام اباد سره شریک او د هغوی له لارښوونې سره سم به یې په اړه اقدامات وکړي.