تاند (سې شنبه، د حمل ۱۴ مه) راپورونه وایي، چې په کندهار کې د امنیتي وضعیت په اړه د طالبانو د رژیم چارواکي اندېښمن شوي او د دوی د استخباراتو ادارې لومړی مرستیال ملا تاج میر جواد د تدابیرو لپاره دغه ولایت ته رسېدلی.
د کندهار لپاره د طالبانو د والي دفتر په یوه اعلامیه کې د نوموړي د سفر خبر تایید کړی او ویلي، چې د هغه په مشرۍ د کندهار د والي او نورو چارواکو د همغږۍ غونډه هم جوړه شوې.
سرچینه زیاتوي، چې په غونډه کې د طالبانو ځایي امنیتي چارواکو د خپلو کړنو په تړاو معلومات ورکړي او د امنیت ښه کولو په اړه ورته خبرې شوي.
په اعلامیه کې له زیاتو جزییاتو پرته راغلي: د غونډې په پای کې لازمې پرېکړې وشوې.
د طالبانو په ډېرو مطبوعاتي اعلامیو کې د دوی د غونډو زیات جزییات او پرېکړې په معمول ډول نه رسنیز کیږي.
ملا تاج میر جواد، چې د طالبانو د ځانمرګو بریدونو او استخباراتو تر ټولو مهم طراح ګڼل کیږي، له هغې وروسته کندهار ته د امنیت ټینګولو لپاره تللی، چې شاوخوا دوه اوونۍ مخکې د دغه ولایت په مرکز کې د نوي کابل بانک مخې ته یوه ځانمرګي بریدګر ګڼو طالبانو او ملکیانو ته مرګ ژوبله واړوله.
د یاد شوي برید مسوولیت داعش ډلې پر غاړه واخیست.
له دې پرته، نور کله هم په وقفه یي ډول له کندهار څخه پر طالبانو د چریکي بریدونو او دغه راز د جنایي پېښو د زیاتیدو خبرونه ورکول کیږي، چې ډېر ځله یې طالبان ردوي او یا یې په اړه رسنیو ته معلومات نه ورکوي.
هیبتی ته ووایې چې له سورې راووځی د نور غریبانو ځامن دې مرګ ته نه ورکوې هیبتیه اوس ورته ټینګ شه د ملت زورول سزا لرې.