تاند (۵ شنبه، د حمل ۹ مه) د پښتونخوا په شانګله کې د ۵ چینایي انجینرانو له وژل کېدو او په دې اړه د چین له جدي اعتراض وروسته، د پاکستان چارواکي سخت وارخطا ښکاري.
په دې لړ کې پرون ناوخته د پاکستان د صدراعظم شهباز شریف، د پوځ مشر جنرال عاصم منیر او ګڼو مرکزي او فیډرالي چارواکو په ګډون غونډه شوې.
په دې غونډه کې عاصم منیر د یادې پېښې د عاملانو د نیولو او مجازات ژمنه کړې.
صدراعظم شهباز شریف هم په دې غونډه کې دغه پېښه ډېره خواشینونکې ګڼلې او پاکستان یې په ملي کچه د ترهګرۍ سخت خطر سره مخ یاد کړی.
پاکستاني چارواکو د دې پېښې په اړه بیا- بیا مختلف بیانونه ورکړي، خو داسې ښکاري چې د چین د قناعت په ترلاسه کولو نه دي بریالي شوي.
د پاکستان د دفاع وزیر خواجه آصف او د بهرنیو چارو وزارت یوه اعلامیه دواړه مدعي شوي، چې دغه برید له افغانستان څخه سرچینه اخلي.
په افغانستان کې د طالبانو واکمن رژیم هم دا تور رد کړی او هم یې پر چینایي انجینرانو برید غندلی.
ډېرو څارونکو او امنیتي شنونکو هم ویلي، چې د پاکستان ادعاوې په دې تړاو بې بنسټه دي.
د تحریک طالبان پاکستان ډله، چې پاکستان پرې د پېښې ملامتي په مستقیمه توګه اچولې؛ هم دغه پېښه کې لاس لرل رد کړي دي.
پاکستان کې اقتصادي ناورین هم د شدت خوا ته روان دی او چین یوازېنی هېواد ښکاري، چې لا یې د دغه هېواد د خپلو اتباعو برعکس دلته خپله پانګونه روانه ساتلې.
باکستان وېره لري، چې د داسې بریدونو دوام به ترې د چین د پانګې لمنه هم ورټوله کړي.
مخکې د بلوڅ بیلتون پالو غورځنګونو په بلوچستان کې پر چینایي اهدافو د بریدونو مسوولیت منلی.
پاکستان تر دې مخکې هم ورته بریدونه یوازې غندلي او پړه یې کله د افغانستان پر خاورې او کله پر هندوستان اچولې ده.
پاکستانی خبریال طاهر خان باور لري، چې له ټولو څرګندونو او توجیهاتو سره د پاکستان د پوځ په ګډون د دغه هېواد ټول بنسټونه د خپل قلمرو په امنیت ساتلو کې ناکام شوي.
واخان مه نیسی د سرحدونو حفاظت وکړی ځانونه په کورونو و ساتی ـ