تاند (دوشنبه، د حمل ۶ مه) راپورونه وایي، چې د فراه په بالابلوک ولسوالۍ کې د طالبانو د ځایي چارواکو او ځواکونو او بزګرانو تر منځ نښته شوې.
د ځینو رسنیو د راپور له مخې، په دې نښته کې ۲ تنه ځایي وګړي وژل شوي هم دي.
له دغې نښتې وروسته، ځایي خلکو د طالبانو د دغې ادعا شوې نښتې خلاف اعتراض کړی او د فراه- هرات لویه لاره یې د اعتراض په بڼه تړلې ده.
د طالبانو ځایي چارواکو دغو راپورونو ته کوم غبرګون نه دی ښودلی.
د فراه بالا بلوک له هغو ولسوالیو څخه و، چې د طالبانو له بیا واکمنیدو مخکې هم تر ډېره د دوی تر ولکې لاندې وه او ډېر فعالیت یې پکې درلود.
ځینې سرچینې وایي، چې دا نښته د طالبانو د ځایي چارواکو له خپلمنځیو ناندریو سرچینه اخلي.