تاند (یکشنبه، د حمل ۵ مه) په افغانستان کې د طالبانو د رژیم بېلابېلې مخالفې ډلې په مسکو کې له خونړي برید وروسته، په دې پېښه کې د طالب رژیم او افغان خاورې د ښکېل ښودلو په هڅه کې دي.
د افغانستان د ملي مقاومت د عالي شورا په نوم ترکیه کې را ټول شوي طالب ضد سیاستوال او له دې دایرې ځینې د باندې نورو سیاستوالو په مختلفو پیغامونو او مرکو کې دې ته ورته ادعاوې کړي او تور یې پورې کړی، چې د دغه برید عاملان افغانستان کې دي، یا د طالبانو رژیم مرسته ورسره کړې ده.
په دې ترڅ کې، د جنبش ګوند مشر عبدالرشید دوستم په یوه غږیز پيغام کې په صراحت سره دغه ادعا کړې او ځینو نورو بیا په ضمني ډول د طالبانو خلاف د روسیې او سیمې د حساسیت پارولو په نیت ورته خبرې کړې دي.
د طالبانو رژیم د مسکو پېښه، چې د موسېقۍ یوه صالون ته نژدې د ۴ بریدګرو لخوا ترسره شوې، غندلې او قربانیانو سره یې غمرازي ښودلې ده.
د روسیې رسنیو او یو شمېر چارواکو په پېښه کې د اوکراین د لاس لرلو ادعاوې کړي او ویلي، چې په تور یې نیول شوي ۴ کسان په روسي ژبه خبرې کوي.
امریکایي سرچینو هم تور پورې کړی، چې د پېښې سمبالښت په ډېر ګومان له افغانستان څخه شوی.
یو شمېر افغانانو، د طالبانو د مخالفانو څرګندونو ته په منفي سترګه کتلي او ویلي، چې د خپلو سیاسي مخالفتونو لپاره نه باید د افغانستان خاوره د ترهګرۍ په مرکز بدل شوې وښيي او پکې د بهرنیو قدرتونو د نیابتي لوبو لړۍ لا پسې زیاته کړي.
د مسکو د پېښې د وژل شویو شمېر شاوخوا یو نیم سل او د ټپیانو شاوخوا سل تنه ښودل شوی.
لمر په ده ګوتو نه پټیږ هغه کسان چی تبلیغات کوی هغوی په خپله په دې پښه کی لاس لرې ځکه هغوی په خپله په زغرده فرانسه کښې د مسعود کورنی اعلان وکړ چې داعش زمونږ ورونه دی مونږ هم دطالب دښمن یو داعش هم د طالب دښمن ده او په ګډه ورسره مبارزه کو بازه نمونه یې د ایران برید وه چی په اصتطلاح مقامت شورا غړې وکړه پنجشیری وه او د مسعود د ډلی نزدې کس هم بلل کیږې